Friday, March 30, 2012

Чимээ

Хотын дарга буудлын цонхоор
Хоосон дарсны лонх шидчихэв.
Хав харанхуйд тэнүүчилж явсан
Хав хар муурыг ончихсонд
Хачин зовиурт чимээ хадав.

Sunday, March 11, 2012

Удахгүй бороо орно

Удахгүй бороо орно.
Урд зам ус болно.
Уртаас урт түгжрэл үүснэ.
Улаан, ногоон, шар гэрэл газарт тунарна.
Урсчихсан усан будаг шиг болно.
Урт хөл, нойтон үс, цангинасан инээд
Улаанбаатрыг улам залуу болгоно.

Saturday, March 10, 2012

Азарган бороог чамласан юм шиг


Азарган бороог чамласан юм шиг
Нулмисандаа бас урсчихаад ирэхэд чинь
Хүйтэн харцаар давхар хайрсан би,
Зүүдэнд чинь харин
Халуун цай, хуурай алчууртай угтаж
Зүрхийг чинь хүртэл дулаацуулсан би.