Азарган бороог чамласан юм шиг

Азарган бороог чамласан юм шиг
Нулмисандаа бас урсчихаад ирэхэд чинь
Хүйтэн харцаар давхар хайрсан би,
Зүүдэнд чинь харин
Халуун цай, хуурай алчууртай угтаж
Зүрхийг чинь хүртэл дулаацуулсан би.

Бодит би, бас зүүдэнд чинь амилсан би.

Амьдралын үнэнд туйлдаж ядраад
Дарсны хатууд халаад ирэхэд чинь
Ширүүн харцаар нэмж ширвэсэн би,
Мөрөөдөлд чинь харин
Нарыг мандуулж, тэнгэрийг цэлмүүлж
Маргаашийг чинь хүртэл мартуулсан би.

Бодит би, бас мөрөөдөлд чинь амилсан би.

Зүүдэндээ чиний харсан би,
Мөрөөдөлдөө чиний зурсан би,
Даанч... бас бодит би.

Намайг бодон суугаа
Энэлэн шаналагч эмзэг турьхан минь
Бүсгүй зөнгөө надад хэлээч!
Залбирал чинь хэр гүнзгий вэ?

Хүслийн чинь долгис намайг ороож
Цээжинд царцсан цэв хүйтэн мөс уярч...
Бодит би
Зүүднээс чинь, мөрөөдлөөс чинь
Хувь заягаа хутган уух болов уу?