Нэг амьсгаагаар - 1

***

Сиймгэр цагаан хөшгөн чанадаас,
Сарны хөлчүү туяа чимээгүйхэн гэтсээр
Сэм хөлөргөн биеийг чинь
Сувдан дуслаар гэрэлтүүлсэн.
Хүслийнхээ чивэлт цуурайг би
Хүүхэн хонгор биений чинь
Хүршгүй алсад хадаасан.

***

Нов ногоон талд нар өөд тэмүүлж
Гараа алдлан инээмсгэлэгч, эсвэл
Бороотой цонхны дэргэд хөлөө тэврэн
Гансарч суугаа бүсгүйн дотоод гоо сайхан
Аль аль нь агшин зуурынх 

***

Утасны цаанаас баяртай гэж хэлэхдээ
Чи үл ялиг инээмсгэлсэн, би мэдсэн.
Үтэр түргэн зүрх түг түг

***

Хар цагаан зураг хамгаас илүүг өгүүлдэг шиг
Чиний энэ их чимээ аниргүй, нам гүм чинь
Хамгаас чангаар цуурайтаад байна.
Гүнд чинь юу нуугдана вэ?