Буурай ээж минь хаана байгаа бол?

Бүлээрэхэд минь өвөртлөөд унтдаг байсан
Буурай ижиигээ
Үхлийн тэвнээр сүлбүүлэн хэвтэхэд нь
Үнэндээ би юу ч хийж чадаагүй.

Одоо хаана байдаг бол, ээжийн минь ээж?
Одод хүртэл харван замхардаг
Оргүй хоосон тэнгэрт лав биш!

Ой санамжнаас минь бүдгэрэн бүдгэрсээр
Царай дүр тань мартагдсаар байгаа ч
Хайр энэрэлийн тань хөврөл
Тархинаас зүрхүү тасралтгүй юүлэгдэж

Цусанд минь цутгасаар

Мэдэгдэхүүн бус мэдрэгдэхүүн болон хувирсаар л байна.